«Сталинград, ураа!» диэт өстөөххө утары сүүрэрбит

Мин 1942 сыл бэс ыйын 20 күнүгэр армияҕа ынырыллыбытым. 26 хонук устата айаннаан, борохуотунан Урал хайаҕа тиийбиппит. Биһиги нэһилиэктэн уонча этибит уоннааҕылар Чурапчыттан этилэр. Ол баран, «ДЮК» диэн лааҕырга ый аҥара үөрэммиппит. Онтон сотору буолаат, Молотов диэн куорат таһыгар биир кыра дэриэбинэҕэ ыйтан ордук үөрэммиппит. Бу дэриэбинэҕэ биэс таҥара дьиэтэ уонна биир уу мельницата баара. Онно сыалай биир армия үөрэнэрэ, үөрэнэн бүтэн баран, көһөн, балаҕан ыйын 23 күнүгэр фроҥҥа барыы буолбута. Уон хонук сатыы айаннаан, Сталинградка тиийбиппит, бүтүннүү сэрии буруота, сир титирэстиирэ, ол тыас ыраахтан иһиллэрэ. Онтон «бука бары сэриигэ бэлэмнэнин» диэн команда кэлбитэ. Ити курдук бэлэмнэнэн баран, алтынны 3 күнүгэр ытыалаһан барбыппыт. Үс төгүл ытыалаһан, бааһырбытым. «Сталинград, ураа!» - диэн хаһыытаат, томтор үрдүгэр ыстаммытым, өстөөх буулдьата ыйылаан кэлэн, окумалбын таппыта. Ый кэринэ ытыаласпыппыт. Мин алтынны 29 күнүгэр бааһырбытым, нэһиилэ километр аҥара сиргэ сыыллан землянкаҕа кэлбитим. Онно бэрэбээскилээн баран, госпитальга илдьибиттэрэ, ыарыы бөҕө этэ. Икки ый кэринэ эмтэммитим, онтон Куйбышев оройуонугар илдьибиттэрэ. Биэс ый эмтэнэн, үчүгэй буолбутум. 1943 сыллаахха саас дойдубар кэлбитим.

Петр Иванович Григорьев, Ороссолуода бөһ.